Kisiwa cha tajiri Richard Branson chaharibiwa na kimbunga Irma

Sir Richard Branson amesema mengi ya majengo na mimea na miti katika kisiwa chake cha Necker katika eneo la Caribbean vimeharibiwa kabisa na Kimbunga Irma.

Necker ni moja ya visiwa 50 ambavyo hujumuisha Visiwa vya Virgin vya Uingereza (BVI).

Sir Richard amesema alitembelea kisiwa kinachokaribia zaidi kisiwa chake cha Necker na kujionea “moja kwa moja ukali na ukatili wa kimbunga hicho”.

Kimbunga hicho kiliua watu watano katika eneo hilo la Uingereza.

Waziri mkuu wa BVI ameomba usaidizi wa muda mrefu kutoka kwa Uingereza.

Sir Richard na wenzake wako salama.

Kimbunag Irma kilipitia Visiwa vya Virgin vya Uingereza katikati mwa wiki iliyopita.

Sir Richard amesema: “Tulihisi nguvu kali zaidi za kimbunga chenye nguvu zaidi kuwahi kupiga kutoka Bahari ya Atlantiki. Lakini tulikuwa na bahati sana kwamba tulikuwa na handaki imara ambalo tulikuwa tumelijenga katika Jumba Kuu la Necker na tulikuwa na bahati sana kwamba watu wote waliokuwa kisiwani wakati wa kimbunga wako salama.”

Amesema kinachofaa kuangaziwa zaidi ni “visa vya maelfu ya watu ambao wamepoteza nyumba zao na bishara zao”.

Mawasiliano bado yamekatizwa katika Visiwa vya Virgin vya Uingereza na Sir Richard kwa sasa yuko katika kisiwa cha Puerto Rico, kilomita kadha magharibi mwa visiwa hivyo vyake.